रत्नागिरी : जिल्हा कोषागार कार्यालयाकडून सर्व निवृत्तीवेतनधारक, कुटुंब निवृत्तीवेतनधारकांचे मासिक पेन्शन हे यापुढे शासनाच्या ई-कुबेर प्रणालीमार्फत भारतीय रिझर्व्ह बँकेतून थेट पेन्शनधारकांच्या खात्यात जमा होणार आहे, अशी माहिती जिल्हा कोषागार अधिकारी प्र. शं. बिरादार यांनी दिली.
पेन्शन जमा करण्यासाठी जी बँक सुरुवातीला घेतली असेल त्याच खात्यातील आयएफएससी कोडनुसार ही पेन्शन जमा होईल. काही पेन्शनधारकांनी कोषागार कार्यालयाची परवानगी न घेता परस्पर बँक खाते इतर जिल्ह्यात तसेच इतर बँकेत बदल करून घेतले असेल तर, अशा निवृत्तीवेतनधारकांचे निवृत्तीवेतन जमा होण्यास अडचणी निर्माण होईल. ज्या पेन्शनधारकांनी परस्पर बँक व बँक खात्यात बदल करून घेतले असतील त्यांनी त्यांचे मूळ बँक खाते ज्या ठिकाणी असेल तेच खाते सुरू ठेवावे, भविष्यात पेन्शनबाबत अडचणी निर्माण झाल्यास त्याची सर्वस्वी जबाबदारी निवृत्तीवेतनधारकांची राहील.
तसेच जिल्ह्यातील सर्व निवृत्ती वेतनधारक, कुटुंब निवृत्तीवेतनधारकांचे मार्च महिन्याचे मासिक पेन्शन हे १० एप्रिलपर्यंत होईल, याची सर्व निवृत्तीवेतनधारकांनी नोंद घ्यावी, असेही जिल्हा कोषागार अधिकारी श्री. बिरादार यांनी सांगितले.
