रत्नागिरी : केंद्रीय माध्यमिक शिक्षा बोर्ड (नवी दिल्ली) यांच्यामार्फत दहावी, बारावीची परीक्षा सुरू असून, ज्या परीक्षा केंद्रांवर ही परीक्षा होणार आहे त्या केंद्रांच्या परिसरात परीक्षेच्या दिवशी अपर जिल्हादंडाधिकारी यांनी प्रतिबंधात्मक आदेश जारी केले आहेत.
यामध्ये बालभारती पब्लिक स्कूल (अंजनवेल, ता. गुहागर), रोटरी इंग्लिश मिडीयम स्कूल (खेड बैतवाडी, ता. खेड), सरस्वती विद्यामंदिर इंग्लिश मिडीयम स्कूल, (जालगांव, पांगरवाडी, ता. दापोली), नवनिर्माण हाय इंग्लिश मिडीयम स्कूल (एमआयडीसी, मिरजोळे, ता. रत्नागिरी), जवाहर नवोदय विद्याल (पडवे, ता. राजापूर), श्री विठ्ठलराव जोशी चॅरिटीज ट्रस्टचे इंग्लिश मीडियम स्कूल (कासारवाडी, सावर्डे, ता. चिपळूण), श्री समर्थ कृपा इंग्लिश मिडीयम (वेरळ, ता. खेड), पोदार इंटरनॅशनल स्कूल (रत्नागिरी), सिध्दीविनायक रेगालिअ (कुवारबाव, कारवांचीवाडी, ता. रत्नागिरी) या परीक्षा केंद्राचा समावेश आहे.
फौजदारी प्रक्रिया संहिता, १९७३चे कलम १४४ प्रमाणे जिल्ह्यांतील या दहावी, बारावी परीक्षा केंद्राच्या १०० मीटर परिसरात प्रतिबंधात्मक आदेश पारीत केला आहे.
या आदेशान्वये परीक्षा केंद्राच्या परिसरात परिक्षार्थी अथवा अन्य व्यक्तीकडून शांततेस बाधा होईल, असे कृत्य करता येणार नाही. १०० मीटर परिसरातील एसटीडी बुथ, झेरॉक्स सेंटर, टायपिंग सेंटर, ध्वनीक्षेपण आदी माध्यमे आदेशाची मुदत संपेपर्यंत बंद राहतील. परीक्षा केंद्राच्या परिसरात मोबाईल फोन, सेल्यूलर फोन, फॅक्स, ई-मेल व इतर प्रसार माध्यमे घेवून प्रवेश करण्यास मनाई असेल. कोणत्याही व्यक्तीकडून परीक्षा सुरळीतपणे व शांततेच्या वातावरणामध्ये पार पडण्यासाठी कोणतीही बाधा उत्पन्न करण्यास मनाई असेल. परीक्षा केंद्रांवर कोणत्याही अनधिकृत व्यक्तीस/वाहनास प्रवेशास मनाई राहील.
हे आदेश परीक्षा केंद्रांवर काम करणारे अधिकारी/कर्मचारी तसेच परीक्षा केंद्रावर निगराणी करणारे अधिकारी/पोलीस अधिकारी यांच्याबाबत त्यांचे परीक्षासंबंधी कर्तव्य पार पाडण्याच्या अनुषंगाने लागू राहणार नाहीत; मात्र त्यांना गैरप्रकार करण्यास प्रतिबंध राहील. या आदेशाची जो अवमान्यता करील तो भारतीय दंड संहिता कलम १८८प्रमाणे शिक्षेस पात्र राहील असेही आदेशात नमूद करण्यात आले आहे.
