भारतीय संरक्षण क्षेत्राच्या सज्जतेसाठी सरकार मोठी पावले उचलत आहे. स्वदेशी बनावटीच्या संरक्षण उत्पादनांना प्राधान्य देण्याचे सरकारचे धोरण आहे. त्याचाच एक भाग म्हणून भारतीय हवाई दलाला (IAF)62000 कोटी रुपयांच्या 97 एलसीए तेजस मार्क 1ए लढाऊ विमाने खरेदीला मंजूरी देण्यात आली आहे. या अपडेटनंतर बुधवारी हिंदुस्तान एरोनॉटिक्स लिमिटेड (HAL) आणि भारत डायनॅमिक्स लिमिटेड (BDL) सारख्या संरक्षण कंपन्यांच्या शेअर्समध्ये 3.5% पर्यंत वाढ झाली.
बीएसईवर एचएएलचे शेअर्स 3.5% वाढून 4611.60 रुपयांच्या दिवसाच्या उच्चांकावर पोहोचले, तर बीडीएलचे शेअर्स 1.35% वाढून 1570.45 रुपयांवर पोहोचले. केंद्र सरकारच्या उच्चस्तरीय बैठकीत ही मंजुरी मिळाली आणि एचएएलला उत्पादन सुरू करण्याचा मार्ग मोकळा झाला. हा नवीन ऑर्डर तेजस मार्क 1ए साठीचा दुसरी मोठी खरेदी आहे. काही वर्षांपूर्वी देण्यात आलेला मागील ऑर्डर सुमारे 48000 कोटी रुपयांच्या 83 विमानांसाठी होती.
या नवीन करारामुळे, हवाई दलासाठी एलसीए मार्क 1ए जेट्सची एकूण संख्या 180 पर्यंत वाढेल. संरक्षण सूत्रांच्या मते, ही जेट्स जुन्या होत चाललेल्या मिग-21 फ्लीटची जागा घेतील, जी येत्या आठवड्यात टप्प्याटप्प्याने बंद केली जात आहे. हवाई दलाच्या अधिकाऱ्यांच्या मते, तेजस उपक्रमामुळे केवळ भारताचे संरक्षण क्षेत्रातील स्वावलंबनच बळकट होणार नाही तर पुरवठा साखळीत सहभागी असलेल्या शेकडो लघु आणि मध्यम उद्योगांना संधी उपलब्ध होतील.
पंतप्रधान नरेंद्र मोदी हे या स्वदेशी उत्पादनांना प्रोत्साहन देत आहेत आणि या कार्यक्रमाचा भाग म्हणून HAL ने स्वदेशी विमाने, हेलिकॉप्टर आणि इंजिनसाठी अनेक ऑर्डर मिळवल्या आहेत. अलिकडेच, संरक्षण अधिग्रहण परिषदेने 1.6 लाख कोटी रुपयांच्या अतिरिक्त प्रस्तावांना देखील मान्यता दिली, ज्यामध्ये 156 LCH प्रचंड हेलिकॉप्टरचे अधिग्रहण आणि 84 Su-30MKI लढाऊ विमानांचे अपग्रेड समाविष्ट आहे.
